Ифтитоҳи Маркази саломатии «Луқмонӣ Ҳаким» дар шаҳри Хуҷанд

19 ноябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар идомаи сафари корӣ дар шаҳри Хуҷанд Маркази нейро-кардию эндоҷарроҳии «Луқмони Ҳаким»-ро мавриди истифода қарор дода, дар он бо шароити муосири хизматрасонии тиббӣ шинос шуданд.

Бинои марказ аз 2 ошёна иборат буда, масоҳати умумии он дар якҷоягӣ бо саҳни ҳавлӣ 2276 метри мураббаъро ташкил медиҳад ва бо риояи меъёрҳои сохтмонӣ бо маблағи 5 миллиону дусад ҳазор сомонӣ бунёд гардидааст.

Корҳои сохтмонӣ дар маркази саломатӣ аз соли 2018 оғоз гардида, дар он зиёда аз 60 нафар мутахассисони маҳаллӣ ба кор ҷалб гардиданд.

Аснои шиносоӣ ба Пешвои миллат муҳтарам Эмомалӣ Раҳмон иттилоъ дода шуд, ки дар марказ ҷарроҳиҳои майнаи сар, мағзи сутунмуҳра, дил ва гурда бо роҳи эндо-ҷарроҳӣ ва ҳамчунин ҷарроҳии кушодаи амрози занона, эндо-протезкунонии бемориҳои ортопедӣ, табобати амрози асаб ва барқароркунӣ ба роҳ монда шудааст.

Дар ин муассисаи тиббӣ табибони баландихтисос, ҳамшираҳои тиббӣ ва кормандони миёнаи тиббӣ, дар маҷмуъ 50 нафар ба кор ҷалб шудаанд. Маркази нейро-кардию эндоҷарроҳӣ бо таҷҳизоти томографияи магнитию-резонансӣ, томографияи компютерӣ, ангиография, рентгени рақамӣ, таҷҳизоти литотрипсияи нави муосир, даруннигарӣ, ташхиси ултрасадо, озмоишгоҳ, табобати физиотерапевтӣ бо намуди лазерӣ, магнитотерапия ва зарбаи мавҷӣ муҷаҳҳаз мебошад.

Марказ дар як вақт имкон дорад, ки зиёда аз 40 нафар беморонро бо хизматрасонии босифат фаро гирад. Сарвари давлат муҳтарам Эмомалӣ Раҳмон пас аз шиносоӣ бо шароити фароҳамгардида дар иншооти муосири тиббӣ, иқдоми муассиси Маркази нейро-кардию эндоҷарроҳии «Луқмони Ҳаким»-ро пурарзиш номида, кормандони марказро барои хизмати софдилона ва муомилаю муоширати хуб ба беморон ҳидоят намуданд.

Бояд гуфт, ки таъмини ҳифзи солимии аҳолӣ бо роҳи бунёди иншооти зарурии соҳаи тандурустӣ аз рӯзҳои аввали Истиқлоли давлатӣ дар меҳвари сиёсати Ҳукумати Ҷумҳурии Тоҷикистон қарор дорад.

Бо дастгириву ғамхориҳои Президенти Ҷумҳурии Тоҷикистон муҳтарам Эмомалӣ Раҳмон марҳила ба марҳила иншооти мавҷудаи соҳа аз таъмир бароварда шуда, дар шаҳру ноҳияҳои кишвар беморхонаву дармонгоҳ ва бунгоҳу марказҳои хизматрасонии тиббии нав сохта мешаванд.

Дар маҷмуъ дар вилояти Суғд ҳоло 939 муассисаи соҳаи тандурустӣ арзи ҳастӣ дошта, дар онҳо наздик ба 30 ҳазор кормандони соҳа, ки аз он 5100 нафарашонро табибони соҳибтахассус ва зиёда аз 18 ҳазор нафари дигарро кормандони миёнаи тиб ташкил медиҳад, фаъолият доранд.

Маркази нейро-кардию эндоҷарроҳии «Луқмони Ҳаким» дар заминаи дастуру супоришҳои Роҳбари давлат бунёд ёфта, барои саривақт ба ташхису таботат фаро гирифтани сокинони вилоят пешбинӣ гардидааст.