Дар Фурудгоҳи байналмилалии Хуҷанд Сарвари давлатро раиси вилояти Суғд Раҷаб Аҳмадзода ва дигар шахсони расмӣ самимона истиқбол гирифтанд.

Маврид ба таъкид аст, ки бо ҳидоятҳои Пешвои миллат муҳтарам Эмомалӣ Раҳмон дар вилояти Суғд ба истиқболи ҷашни 35-солагии Истиқлоли давлатӣ баъди бунёд, таъмир ва навсозӣ бештар аз 12 ҳазор иншооти гуногун ба истифода дода шуда, то моҳи сентябри соли 2026 боз 2 ҳазор иншооти дигар бунёд карда мешавад.

Маросими гусели Пешвои миллат муҳтарам Эмомалӣ Раҳмон дар фурудгоҳи шаҳри Хоруғ, мисли лаҳзаҳои истиқболи эшон, бо шукӯҳу шаҳомат ва эҳсоси баланди сипосгузории мардуми Бадахшон доир гардид. Сокинони вилоят бо садоқат ва муҳаббати самимӣ ба Роҳбари давлат, меҳмони олимақомро дар фазои пур аз эҳтиром ва шодиву нишот гусел карданд.

Аҳли фарҳанги вилоят бо ҷалби ҳунармандону сокинон барномаи ҷолиби фарҳангӣ манзур намуда, сурудҳо дар васфи Ватан, Пешвои миллат ва муҳаббати мардумро бо эҳсоси баланд иҷро карданд. Лаҳзаҳои гусел воқеан ба як саҳнаи эҳсоси миллӣ ва арҷгузорӣ ба сиёсати хирадмандонаву инсондӯстонаи Пешвои хирадманд табдил ёфт.

Сафари кории Сарвари давлат муҳтарам Эмомалӣ Раҳмон, ки аз 25 то 28 июн дар ноҳияҳои Дарвоз, Ванҷ, Рӯшон, Роштқалъа, Шуғнон ва шаҳри Хоруғ сурат гирифт, ба ифтихори таҷлили ҷашни умумимиллии 28-солагии Ваҳдати миллӣ доир гардид.

Дар ҷараёни ин сафари пурбаракат Пешвои миллат як силсила иншооти таъйиноти гуногунро мавриди истифода қарор дода, ба сохтмони як зумра иншооти нав санги асос гузоштанд, ки ҳамаи он самараи сиёсати созанда ва ғамхории бевоситаи Сарвари давлат нисбати мардуми сарбаланди Бадахшон мебошад.

Яке аз ҳадафҳои муҳими сафари Пешвои миллат, мулоқоти рӯ ба рӯ бо мардуми сарбаланди вилоят, шунидани дарду пешниҳоди онҳо ва тарҳрезии нақшаҳои рушди иҷтимоиву иқтисодии ВМКБ арзёбӣ мегардад. Зимни ин мулоқотҳо Сарвари давлат сокинони вилоятро бо 28-солагии ҷашни Ваҳдати миллӣ таҳният гуфта, барои вусъати корҳои ободонӣ ва омодагии шоиста ба таҷлили бошукӯҳи 35-солагии Истиқлоли давлатии Ҷумҳурии Тоҷикистон раҳнамоӣ карданд.

Маросими гусели Пешвои миллат дар шаҳри Хоруғ — таҷассуми эҳтиром, арҷгузорӣ ва пайванди ногусастании мардум бо Сарвари давлат аст.

 

 

 

 

 

 

 

 

 

 

 

 

Нахуст, Пешвои миллат муҳтарам Эмомалӣ Раҳмон ҳама ҳозирин ва мардуми шарифи кишварро бо санаи муҳими таърихӣ солгарди ваҳдати миллӣ табрику таҳният гуфтанд.

Таъкид гардид, ки мо ба ваҳдати миллӣ маҳз ба шарофати ақлу хирад ва иродаи қавии мардуми сарбаланди кишвар расидем ва он оғози марҳалаи нав дар таърихи давлатдории мо гардид.

Сарвари давлат ваҳдати миллиро рамзи сулҳу оромӣ, суботи сиёсӣ, омили асосии рушди устувори ҳамаи соҳаҳои ҳаёти ҷомеа ва давлат арзёбӣ намуданд.

Муҳтарам Эмомалӣ Раҳмон дар шароити мураккаби ҷаҳони имрӯза нигоҳ доштани фазои сулҳу субот ва таҳкими ваҳдати миллиро вазифаи муқаддаси ҳар фарди бедордилу ватандӯст номиданд.

Гуфта шуд, ки миллати фарҳангиву тамаддунсози тоҷик аз оғози таърихи ташаккулёбии худ пуштибону тарғибгари фарҳанги сулҳ ва ойини сулҳофарӣ буд.

«Мо, ки ворисони мероси ҷовидонаи ниёгони некноми худ мебошем, ҳанӯз беш аз сӣ сол қабл фаъолияти шабонарӯзиро ба хотири қатъи ҷанги таҳмилии шаҳрвандӣ ва таъмин намудани сулҳ оғоз кардем», изҳор доштанд Президенти кишвар муҳтарам Эмомалӣ Раҳмон.

Сарвари давлат аз оқибатҳои ҷанги таҳмилии шаҳрвандӣ ёдовар шуда, доир ба тадбирҳои андешидаи роҳбарияти давлату ҳукумати кишвар баҳри наҷоти миллат, аз парокандагӣ эмин нигоҳ доштани сарзамин ва баргардондани ҳамватанон ба Ватан андешаронӣ намуданд.

Роҳбари давлат муҳтарам Эмомалӣ Раҳмон таъкид доштанд, ки ин корро барои он анҷом додем, ки миллати мо сарҷамъ бошад.

Таъкид гардид, ки бо шарофати сулҳу оромӣ, суботи сиёсӣ, ваҳдати миллӣ ва тадбирҳои андешидаи Ҳукумати кишвар имрӯз сатҳу сифати зиндагии мардумамон пайваста боло меравад ва шаҳрвандони Тоҷикистон ба хотири фардои ободи Ватан ва ояндаи дурахшони фарзандону набераҳои худ ба заҳмати созандаву ободгарона машғуланд.

«Ҷомеаи ҷаҳонӣ имрӯз Тоҷикистонро ҳамчун кишвари дар ҳалли масъалаҳои глобалии сайёра пешсаф мешиносад, эътироф мекунад ва ташаббусҳои онро дастгириву амалӣ месозад», изҳор доштанд Пешвои миллат муҳтарам Эмомалӣ Раҳмон.

Баргузории Конфронси сатҳи баланд доир ба ҳифзи пиряхҳоро, ки чанд рӯз пеш дар пойтахти кишварамон доир гардид, Сарвари давлат далели возеҳи ин гуфтаҳо номиданд.

Зимни суханронӣ Президенти кишвар муҳтарам Эмомалӣ Раҳмон сафари навбатии кории худро ба як қатор шаҳру ноҳияҳои вилоят натиҷагирӣ намуда, бунёди шоҳроҳҳои замонавӣ тавассути ҳудуди Вилояти Мухтори Кӯҳистони Бадахшон, ифтитоҳи неругоҳи барқии обии Себзор дар ноҳияи Роштқалъа бо тавоноии 11 мегаватт ва дигар иншооти ҳаётан муҳимро руйдодҳои тавсеабахши рушди вилоят номиданд.

Пешвои миллат муҳтарам Эмомалӣ Раҳмон иброз доштанд, ки имрӯз ҳисси худшиносиву худогоҳӣ ва ҳувияти миллӣ, ифтихор аз Ватани соҳибихтиёру озод, пос доштани мероси таърихиву арзишҳои фарҳангӣ ва дарки масъулияти шаҳрвандии мардуми тоҷик бамаротиб густаришу тақвият ёфтааст ва ин падидаи нек моро ба ояндаи дурахшони ҷомеаи демократӣ, ҳуқуқбунёд ва дунявӣ умеди қавӣ мебахшад.

Дар фароварди сухан Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон таъкид намуданд, ки дар шароити ҳозира ҳар як фарди худогоҳи кишварро зарур аст, ки барои дар рӯҳияи ватандӯстиву ватанпарварӣ ва расидан ба қадри истиқлолу озодӣ, сулҳу субот ва ваҳдати миллӣ тарбия кардани фарзандони худ, яъне наврасону ҷавонон саъю талош варзад.

Баъди суханронии Роҳбари давлат муҳтарам Эмомалӣ Раҳмон ба ифтихори Рӯзи ваҳдати миллӣ барномаи консертии устодони санъати тоҷик ва ҳунармандони вилоят баргузор гардид, ки бо шукуҳу шаҳоматаш мақбули меҳмонони ҷашнвора шуд.

Барномаи консертӣ аз рақсу сурудҳои тараннумгари сулҳу ваҳдати сартосарӣ ва дӯстию бародарӣ иборат буд.

Дар тадбири фарҳангӣ шеърҳо аз шоирони маҳбуб ва навоҳои оҳангсозони шинохтаи кишвар истифода карда шуд.

Барои рангину хотирмон сохтани барномаи идона 5000 ҳунарпешаи касбӣ ва ҷавонони соҳибистеъдоду ҳаваскор ба он ҷалб шуданд.

Суруду оҳангҳои тозаэҷоди аҳли санъат ба барнома шукуҳи тоза бахшид ва тантанаи ҷашни ваҳдати миллӣ дар фазои шаҳри Хоруғ барои меҳмонон ва иштирокдорони он танинандоз гардид.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Коргоҳи технологии Неъматҳои Помир, ки маҳсулоти гӯштӣ ва ҳасиб истеҳсол мекунад, бо таҷҳизоти муосири истеҳсолӣ муҷаҳҳаз гардида, иқтидори истеҳсолии он то 3 тонна маҳсулоти гӯштӣ дар як шабонарӯз мебошад.

Дар коргоҳ зиёда аз 50 сокини маҳаллӣ бо ҷои кори доимӣ ва шароити мусоиди корӣ таъмин гардидааст.

Навъҳои гуногуни ҳасиб ва маҳсулоти гӯштии ин корхона тибқи стандартҳои байналмилалӣ таҳия шуда, ба бозори дохилӣ ва дар оянда ба содирот равона мегардад.

Сарвари давлат муҳтарам Эмомалӣ Раҳмон ифтитоҳи чунин корхонаву коргоҳҳоро барои рушди саноати хӯрокворӣ, таъмини амнияти озуқаворӣ, фароҳамсозии ҷойҳои корӣ ва баланд бардоштани сатҳи зиндагии аҳолӣ муҳим арзёбӣ намуда, ба фаъолияти корхона баҳои баланд доданд.

Корхонаи истеҳсоли обҳои табиии ташнашикани ҶДММ Нарзани Помир бо ҷалби сармояи дохилӣ ва истифодаи технологияи муосири тавлидоти саноатӣ бунёд гардида, иқтидори истеҳсолии он дар як шабонарӯз то 3 ҳазор шиша оби нӯшокии табииро дар бар мегирад.

Истеҳсоли маҳсулот бо сифати баланд, мутобиқ ба меъёрҳои байналмилалӣ, сурат мегирад ва ба бозорҳои дохилӣ ва хориҷӣ равона карда мешавад.

Корхонаи Нарзани Помир, ки самти асосии фаъолияташ истеҳсоли намудҳои гуногуни обҳои ташнашикан аст, дар доираи Стратегияи миллии рушди саноати Тоҷикистон барои давраи то соли 2030 ва бо ҳадафи коркарди неъматҳои табиии кишвар, аз ҷумла обҳои шифобахш, таъсис ёфтааст.

Дар заминаи оби маъдании дорои хусусиятҳои табобатии худ, истеҳсоли оби нӯшокӣ ва дигар маҳсулоти солимгардонӣ дар назар аст.

Пешвои миллат муҳтарам Эмомалӣ Раҳмон ба сифати обҳои коркардшуда ва аз ҷиҳати экологӣ тоза баҳои баланд доданд.

Сарвари давлат муҳтарам Эмомалӣ Раҳмон ташкили чунин коргоҳҳои истеҳсолиро бо истифода аз обҳои тоза ба манфиати кор номиданд.

Рушди соҳаи саноати коркарди обҳои маъданӣ дар Баадахшон ба беҳдошти сатҳи зиндагии сокинон ва афзоиши ҷойҳои кории доимӣ мусоидат менамояд.

Баробари ба фаъолият шуруъ намудани корхонаи Нарзани Помир 12 сокини маҳаллӣ бо ҷойи кори доимӣ ва маоши хуб таъмин шуданд.

Президенти кишвар муҳтарам Эмомалӣ Раҳмон таъкид доштанд, ки истеҳсоли оби нӯшокии шифобахш дар ин минтақаи кӯҳӣ, ки обҳои табиӣ ва маъдании он дар Осиёи Марказӣ камназир аст, иқдоми муҳиме дар роҳи истеҳсоли маҳсулоти ватанӣ ва ба бозори ҷаҳонӣ баровардани оби маъдании Тоҷикистон аст.

Ифтитоҳи корхонаи истеҳсоли обҳои Нарзан Помир дар шаҳри Хоруғ як қадами дигар дар роҳи саноатикунонии кишвар ва истифодаи оқилонаи захираҳои табиӣ буда, нишонаи равшани сиёсати хирадмандонаи Пешвои миллат муҳтарам Эмомалӣ Раҳмон мебошад, ки тамоми гӯшаҳои Тоҷикистонро ба масири рушду тараққиёт раҳнамоӣ менамоянд.

 

 

 

 

 

 

 

 

 

Нахуст, ба Сарвари давлат лоиҳаи бунёди бинои баландошёнаи хонаҳои истиқоматӣ муаррифӣ карда шуд. Иттилоъ дода шуд, ки дар қабати якум ва дуюми бино маркази хизматрасонӣ ва тиҷоратӣ пешбинӣ шуда, дигар ошёнаҳо иборат аз хонаҳои истиқоматии 1,2 ва 3 ҳуҷрадор хоҳанд буд. Масоҳати замин ва зери сохтмони иншоот мутаносибан 0,28 гектар ва 1 ҳазору 276 метри мураббаъро ташкил медиҳад.

Лоиҳаи маҷмааи варзишӣ, ки дар заминаи нақшаи чорабиниҳо бахшида ба истиқболи ҷашни бузурги миллӣ - 35- солагии Истиқлоли давлатӣ бунёд мегардад, аз ҷониби ҶДММ “Кохи Муҳандисон” таҳия шуда, дар масоҳати 0,34 га сохта мешавад.

Иншооти варзишӣ дуошёна буда, аз ошхона бо 20 ҷой, ҳуҷраҳои либосивазкунӣ, ҳуҷраи мураббӣ, минбар бо ҷои нишаст барои 240 нафар ва дигар иншооти ёрирасон иборат аст.

Дар ҳамин ҷо, ҳамчунин, ба Пешвои миллат муҳтарам Эмомалӣ Раҳмон лоиҳаи меҳмонхона ва бинои баландошёнаи истиқоматӣ муаррифӣ карда шуд.

Иттилоъ дода шуд, ки меҳмонхона бо назардошти талаботи замони муосир сохта шуда, аз 6 ошёна ва таҳхона иборат хоҳад буд. Бинои баландошёнаи хонаҳои истиқоматӣ дар кӯчаҳои Шириншоҳ Шоҳтемур ва Нуралибеки Атобек аз ҷониби ҶДММ “Сомони давр” бо тарҳи муосир бунёд гардида, аз марказҳои хизматрасонию тиҷоратӣ ва дигар шароити маишӣ барои зиндагии шоиста иборат хоҳад буд.

Бино бо назардошти талаботи рӯз сохта хоҳад шуд. Пас аз шиносоӣ бо лоиҳаи иншооти сохташаванда Пешвои миллат маҳтарам Эмомалӣ Раҳмон ба ташаббускорон барои иҷрои ин амали шоиста, изҳори миннатдорӣ карда, ба онҳо барои анҷоми корҳои сохтмонӣ дастуру тавсияҳо доданд.

Ҳамчунин дар ин рӯз, силсилаи лоиҳаҳои иншооти бунёдшаванда, аз ҷумла лоиҳаи “Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика”, ки дар асоси созишномаи грантӣ миёни Ҳукумати Ҷумҳурии Тоҷикистон ва Бонки Осиёи Рушд амалӣ мешавад, муаррифӣ карда шуд. Тавре иттиллоъ доданд, тарҳи мазкур бо маблағи 40 миллион доллари Иёлоти Муттаҳидаи Амрико, дар 22 муассисаи таҳсилоти ҳамагонии кишвар амалӣ мешавад, ки ҳоло кор дар ин самт бомаром идома дорад.

Зимни муаррифии лоиҳаҳои сохтмони бинои иловагӣ дар назди муассисаи таҳсилоти ҳамагонии №2-и шаҳри Хоруғ ва сохтмони бинои иловагӣ бо озмоишгоҳҳои замонавӣ дар соҳаҳои илмҳои табиӣ, технологӣ, муҳандисӣ ва математика, таъкид гардид, ки иншооти бунёдшаванда дар асоси нақшаи чорабиниҳои беҳтарсозии инфрасохтор дар соҳаи илму маориф амалӣ мешавад. Тибқи нақша ҳамаи лоиҳаҳои муаррифишуда, бо назардошти талаботи муосир бунёд гардида, дар онҳо таъмини босифати имкониятҳои мусоиди кору фаъолият пешбинӣ шудааст.

Сарвари давлат таъкид доштанд, ки ҳар як бинои бунёдшаванда, бояд дар доираи талаботи сохтмонию шаҳрсозӣ иҷро гардида, ба сифати корҳо аҳамияти ҷиддӣ дода шавад, то онҳо барои садсолаҳо ба наслҳои имрӯзу оянда хизмат расонад.

Ташаббускорон барои дастгирии ҳамешагӣ ба Роҳбари давлат муҳтарам Эмомалӣ Раҳмон изҳори миннатдорӣ намуда, ваъда доданд, ки минбаъд низ дар партави сиёсати созандаи Ҳукумати кишвар фаъолият карда, барои рушд ва пешрафти Ватан ҳиссагузор хоҳанд буд.

 

 

 

 

 

 

 

 

 

 

 

 

 

Иншоот дар доираи истиқболи ҷашни бузурги миллӣ-35-солагии Истиқлоли давлатӣ ва амалишавии Стратегияи рушди Ҷумҳурии Тоҷикистон барои давраи то соли 2030 рӯи даст гирифта шуда, аз ҷониби соҳибкорзани муваффақ Гуланор Одилбекова бунёд ёфтааст.

Бино дар маркази шаҳри Хоруғ дар масоҳати умумии 280 метри мураббаъ бо риояи талаботи шаҳрдорию шаҳрсозии муосир сохта шуда, аз 5 ошёна ва таҳхона иборат аст.

Ба Сарвари давлат муҳтарам Эмомалӣ Раҳмон иттилоъ дода шуд, ки дар ошёнаи якуми бино китобхонаи кӯдаконаи вилоятӣ, қабати дуюм китобхонаи шаҳрии ба номи Ҳофизи Шерозӣ ва дар қисмҳои болоии бино Маркази рушди зеҳни сунъӣ ҷойгир хоҳад шуд.

Ҳарду китобхона дорои толори хониш, ҳуҷраи нигоҳдории китоб, толор барои баргузории маҳфилҳои илмию адабӣ, китобхонаи электронӣ бо дастрасии беш аз 5 ҳазор адабиёт буда, бо техникаю лавозимоти зарурӣ муҷаҳҳаз шудаанд.

Дар қисми алоҳидаи китохбонаи кӯдаконаи вилоятӣ гӯшаҳои озмунҳои ҷумҳуриявӣ, аз ҷумла озмуни ҷумҳуриявии “Фурӯғи субҳи доноӣ китоб аст” ташкил шудааст, ки дар он ҳамаи адабиёти зарурӣ барои дӯстдорони китоб маҳфуз аст.

Сарвари давлат муҳтарам Эмомалӣ Раҳмон ба ҳиммати соҳибкор, барои ташкили чунин пойгоҳи илму дониш баҳои баланд дода, иқдоми мазкурро намунаи ибрат арзёбӣ намуданд.

Пешвои миллат бунёд ва муҷаҳҳазгардонии иншоотро бо адабиёти зарурӣ ва фаъолияти Маркази рушди зеҳни сунъӣ дар маркази шаҳри Хоруғро қадами устувор дар роҳи илму дониши муосир арзёбӣ карданд.

Бояд таъкид намуд, ки то имрӯз масъулини китобхонаҳои кӯдаконаи вилоятӣ ва шаҳрии ба номи Ҳофизи Шерозӣ, аз набудани шароит дар ин самт ва дастрас набудани адабиёти зарурӣ мушкилӣ доштанд. Ҳоло бо роҳнамоиҳои Сарвари давлат муҳтарам Эмомалӣ Раҳмон инфрасохтори зарурӣ дар ин самт таъмин гардид. Зимни муаррифии фаъолияти Маркази рушди зеҳни сунъӣ, аз ҷумла таъкид гардид, ки марказ бо назардошти талаботи замон фаъолият дошта, ба он омӯзгорони соҳибтахассус, донандагони хуби забонҳои хориҷию илмҳои муосир ҷалб шудаанд.

Рӯи даст гирифтани тадбири мазкур, дар асоси амалинамоии Стратегияи руши зеҳни сунъӣ дар Ҷумҳурии Тоҷикистон барои давраи то соли 2040 ба ҳисоб меравад, ки кишвари мо дар ин самт қадамҳои устувор мегузорад.

Президенти кишвар муҳтарам Эмомалӣ Раҳмон рушди зеҳни сунъиро дар замони мусоир яке аз унсурҳои ҷудонопазир бобати пешрафти иқтисоди рақамӣ неку муассир арзёбӣ намуда, фаъолияти самарабахш дар ин ҷодаро ба манфиат маънидод карданд.

Гуфта шуд, ки маҳз барои ҳамин солҳои 2025-2030 “Солҳои рушди иқтисоди рақамӣ ва инноватсия” эълон гардидааст, ки яке аз самтҳои асосии он рушди зеҳни сунъӣ ва ҳамгироии он ба иқтисод ва идоракунии давлатӣ мебошад.

Зимни шиносоӣ Сарвари давлат ба иҷрои корҳои сомонёфта, баҳои баланд дода, ба масъулин барои боз ҳам беҳтар намудани сатҳу сифати кор ва тарбияи дурусти наврасону ҷавонон ба илмҳои замони муосир дастуру тавсияҳои мушаххас доданд.

Дастандаркорон аз дастгириҳои пайвастаи Роҳбари давлат аз бахши хусусӣ изҳори миннатдорӣ карда, дар оянда барои саҳмгузорӣ дар ободонии кишвар изҳори омодагӣ намуданд.

 

 

 

 

 

 

 

 

 

 

 

 

 

Сохтмони иншооти мазкур дар доираи нақшаи чорабиниҳои ободонӣ бахшида ба 35-солагии Истиқлоли давлатӣ соли 2021 аз ҷониби 5 соҳибкори ватандӯст, оғоз гардида буд. Иншоот бо истифода аз масолеҳи сохтмонии ватанӣ дар масоҳати умумии 643 садяк замин бо сифати баланд ва ҷавобгӯ ба меъёрҳои замони муосир бунёд шудааст.

Иттилоъ дода шуд, ки Шурои иттифоқҳои касабаи Вилояти Мухтори Кӯҳистони Бадахшон, ки дар ошёнаи дуюми марказ ҷойгир аст, дорои 9 ҳуҷраи муосири корӣ ва толори маҷлисӣ бо 30 ҷойи нишаст мебошад.

Дар баробари 4 аъзои Шурои иттифоқҳои касабаи вилоят боз 20 корманди иттифоқҳои касабаи соҳавӣ, муассисаҳои давлатӣ, ҷамъиятӣ ва бонкӣ, нақлиёт ва хоҷагии роҳҳо, фарҳанг, иттилоот, варзиш ва сайёҳӣ, комплекси агросаноатии вилоят низ дар бинои навбунёд, бо шароити муосири корӣ, таъмин гардидаанд.

Роҳбари давлат муҳтарам Эмомалӣ Раҳмон зимни шиносоӣ бо шароиту имкониятҳои фароҳамоварда ба иқдоми соҳибкорони шаҳри Хоруғ баҳри бунёди чунин як иншооти зебо баҳои баланд доданд.

Аснои боздид дар пешайвони бинои муосир ба Пешвои миллат муҳтарам Эмомалӣ Раҳмон намунаи ҳунарҳои мардумӣ муаррифӣ гардид.

Дар гӯшае барои ҷалби сайёҳон армуғонҳои хотиравӣ, ба монанди ҷӯроб ва шероз, намунаи сангҳои ороишии Бадахшон ба намоиш ва фуруш гузошта шудаанд.

Ҳамчунин дар иншооти муосир коргоҳи ширкати “Хушкори Хоруғ”, ки ба истеҳсоли маҳсулоти ороишӣ ва чопӣ бо истифода аз технологияҳои замонавӣ, аз ҷумла тайёр намудани шиору овезаҳо, оро додани дохили биноҳои нав тавассути тайёр намудани нишона, лавҳа, навиштаҷот, ҳарфҳои равшандиҳанда машғул мебошад, ҷойгир шудааст.

Инчунин, дар ошёнаҳои дигари иншооти муосир, маркази фароғату истироҳати кӯдакон, кинотеатри хурд барои кудакону калонсолон ва қаҳвахонаҳо бо таомҳои гуногуни милливу аврупоӣ пешбинӣ гардидааст.

 

 

 

 

 

 

 

 

 

 

 

 

 

Сохтмони иншооти мазкур дар маркази шаҳри Хоруғ моҳи марти соли 2016 оғоз гардида, моҳи июни соли равон ба итмом расонида шуд.

Бинои навбунёд дар масоҳати умумии 1000 метри мураббаъ дар маркази шаҳр қомат афрохтааст.

Чойхонаи Хатлон дорои меҳмонхонаи замонавӣ буда, дар он 24 ҷойи хоб барои меҳмонону сайёҳон фароҳам оварда шудааст.

Акнун баробари ба истифода додани иншооти иҷтимоиву хизматрасонии мазкур 15 нафар сокинони маҳалӣ бо кори доимӣ таъмин гардид.

Роҳбари давлат муҳтарам Эмомалӣ Раҳмон бо чойхона, ки бо шаклу унсурҳои миллӣ, дар фазои озоди хушобу ҳавои ин табиати биҳиштосо, дар болои дарёи Панҷ сохта шудааст, дидан намуданд ва ба корҳои созандагии соҳибкори ватандӯст баҳои баланд доданд.

Атрофи чойхонаи Хатлонро кӯҳҳои сарбафалак ва дарахтони ҳамешасабзи табиӣ ҳусну таровати тоза бахшидааст.

Дарёи Панҷ аз лиҳози экологӣ тоза буда, дорои ду намуди моҳӣ – Карелу Маринка мебошад. Ин имконият фароҳам меоварад, ки ҳангоми истироҳат мизоҷ ва меҳмонону сайёҳон ба моҳигирӣ машғул шуда, истироҳати худро дучанд комил намоянд.

Дар ҳамин ҷо Президенти кишвар муҳтарам Эмомалӣ Раҳмон бо 100 ятими кул ва шахсони имконияташон маҳдуд аз шаҳру ноҳияҳои вилоят мулоқот анҷом доданд.

Вохӯрии Роҳбари давлат бо нафарони бо амри тақдир аз падару модари худ маҳруммонда дар меҳвари таваҷҷуҳ ва пуштибонӣ қарор доштани ятимону ниёзмандон ва шахсони имконияташон маҳдуд аз ҷониби давлату ҳукумат арзёбӣ мешавад.

Зимни мулоқот Пешвои миллат муҳтарам Эмомалӣ Раҳмон таъкид намуданд, ки Ҳукумати Ҷумҳурии Тоҷикистон барои таъмини шароити хуб таҳсил ва зиндагии шоистаи онҳо пайваста чораҳои саривақтиву зарурӣ ва муассир меандешад.

Дар ҳамин ҷо аз ҷониби Роҳбари давлат муҳтарам Эмомалӣ Раҳмон барои ятимон ва шахсони имконияташон маҳдуд хони идонаи пурнозу неъмат ороста гардид ва онҳо, ҳамчунин, бо туҳфаҳои хотирмон сарфароз гардонида шуданд. Туҳфаҳо аз сару либос, лавозимоти дарсӣ, шириниҳо ва маблағҳои пулӣ иборат буд.

Президенти кишвар муҳтарам Эмомалӣ Раҳмон ба масъулин бобати нигоҳубини хуби ятимону барҷомондагон дастуру тавсияҳо дода, насли наврасро ба омухтани дониш, касбу ҳунар ва забонҳои хориҷӣ ҳидоят намуданд.

 

 

 

 

 

 

 

 

Корҳои сохтмонӣ дар иншоот 1 июни соли 2023 оғоз гардида буд.

Дарозии пул 200 метр ва паҳноияш 10 метр аст.

Пули замонавӣ бо 7 сутуни устувор, деворҳои муҳофизатӣ ва такядеворҳо мустаҳкам карда шудааст.

Сохтмони пул дар доираи ҳамкории судманди Ҳукумати Ҷумҳурии Тоҷикистон бо Бонки Ҷаҳонӣ ва марҳилаи чоруми “Барномаи беҳтар намудани роҳҳои алоқаи минтақавӣ дар Осиёи марказӣ” дар шаҳри Хоруғ анҷом дода шудааст.

Дар шафати пули мошингузар панҷараҳои оҳанин насб гардида, аз ду тараф роҳи пиёдагард бо паҳноии 2,20 метр сохта шудааст.

Инчунин, мутобиқи талабот зери новаҳои обгузар дигар конструксияҳои оҳану бетонӣ насб гардида, гирду атрофи пул чароғон карда шудааст.

Иқтидори борбардории пул 80 тоннаро дар бар гирифта, аз ду тарафаш зинапояҳо барои сокинон бо тарҳу меъмории муосир сохта шудааст.

Бо қаноатмандӣ таъкид гардид, ки сохтмони пули мошингузар дар маҳаллаи Шарифобод василаи беҳтарини рафтуомади сокинон ва коҳиши танбашавии нақлиёт дар шаҳри Хоруғ мешавад.

Сокинон аз бунёд ва мавриди ба истифода қарор гирифтани пули мошингузар изҳори хушнудӣ намуда, ба Пешвои миллат муҳтарам Эмомалӣ Раҳмон миннатдории худро баён доштанд.

  

Иншоот дар асоси дастуру супоришҳои Пешвои миллат муҳтарам Эмомалӣ Раҳмон ба хотири фароҳам овардани шароити мусоиди фаъолият барои кормандони мақомоти иҷроияи ҳокимияти давлатии шаҳри Хоруғ бунёд гардида, дорои шароити хуби кору хизматрасонӣ мебошад.

Бинои ҳукумати шаҳри Хоруғ аз 7 ошёна иборат буда, сохтмони он аз ҷониби Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон аз ҳисоби маблағҳои буҷетӣ бо сифати баланд ва бо риояи меъёрҳои сохтмонӣ анҷом дода шудааст.

Ба Сарвари давлат муҳтарам Эмомалӣ Раҳмон иттилоъ доданд, ки иншооти нав дорои 150 ҳуҷраи корӣ барои 300 нафар, толори маҷлис барои 400 нафар ва толори хурди маҷлисӣ мебошад.

Бино, инчунин, бо тамоми инфрасохтор аз қабили системаи гармидиҳӣ дар фасли зимистон, таваққуфгоҳ, зеристгоҳи барқӣ, китобхонаи анъанавӣ ва электронӣ, ошхона ва дигар иншооти ёрирасон таъмин буда, ҳамаи ҳуҷраҳо тибқи стандартҳои матлуб ҷиҳозонида шудааст.

Дар таҳхона ҳуҷраҳои техникӣ ва анборҳо ба назар гирифта шудааст. Ороиши зоҳирии иншоот бо истифода аз гранит, тахтасангҳои хоро ва мармар сурат гирифта, намои бино бо истифода аз санъати баланди меъморӣ ва ороиши миллию ҷаҳонӣ зиннат дода шудааст.

Барои зебу зиннати дохили бино аз кандакориҳои рӯи гаҷ, панелҳо аз навъи чубҳои қимматбаҳо ва рангҳои аълосифат истифода шудааст.

Пешвои миллат муҳтарам Эмомалӣ Раҳмон аснои шиносоӣ бо имкониятҳои бинои нав, ба сифати корҳои сохтмонӣ баҳои баланд дода, иншоотро туҳфаи арзандаи Ҳукумати Ҷумҳурии Тоҷикистон ба шаҳри Хоруғ дар пешоруйи 28-умин солгарди Ваҳдати миллӣ ва 35-солагии Истиқлоли давлатии Ҷумҳурии Тоҷикистон унвон намуданд.

Роҳбари давлат муҳтарам Эмомалӣ Раҳмон зимни боздид аз бинои нав зикр карданд, ки бо истифода аз шароити фароҳамшуда кормандони Мақомоти иҷроияи ҳокимияти давлатии шаҳри Хоруғ вазифадоранд, ки дар татбиқи ҳадафҳои неки ҳукумати мамлакат, таъмини зиндагии шоистаи мардум, пешбурди корҳои созандагиву ободонӣ саҳми беш аз пеш гузоранд.

Ёдовар мешавем, ки бо назардошти ниёзи Мақомоти ичроияи ҳокимияти давлатии шаҳри Хоруғ ба бинои замонавӣ Пешвои миллат муҳтарам Эмомалӣ Раҳмон соли 2019 барои оғози бунёди он санги асос гузошта буданд.

Бинои пештараи мақомоти шаҳр дар кӯчаи Шириншоҳ Шоҳтемур ба талаботи фаъолияти корӣ чандон ҷавобгӯ набуд.

Қомат афрохтани бинои наву замонавии мақомоти иҷроияи ҳокимияти давлатии шаҳр дар яке аз кӯчаҳои марказию маъмурии Вилояти Мухтори Кӯҳистони Бадахшон ба ороиши бештари шаҳри Хоруғ мусоидат кардааст.